Bent Tounes
*Tus: une société tunisienne de transport urbain et sururbain
اول ما بدعوها هالتوس قلنا ايية واحد حمد الله عليه كيف ولى يروح بقدرو في نقل جماعي و قاعد و زيد بسعر مدروس و معقول و كيف العادة و الله لا تقطعنا عادة ماللول وراونا وجه السوق و جابونا بناويت نضيفات و سيسات و متربيات و انتي تبدا قاعد في كرسيك و تجيك تقصلك تيكي مبتسمة بشوشة و الكليماتيزور يخدم و موزايك ف م خدامة يا بنبك حاسيلو سبحان المعز واحد قال اخيرا الترنسبور في تونس اتطور
برا يا زمان و ايجا يا زمان رقدوا قاموا زادو في سعر التذكرة قلنا برا ميسالش باقي معقول قدام هالعز كلو برا يا زمان و ايجا يا زمان و اذا بيهم الانسات المبتسمات ولاو يكشو و ينشو و ينطرو و اللي تجيك وجها مقلوب و اللي تمدلها وريقة بو عشرلاف عدها باش تهبط عليك ببونيه منين انجيبلك صرف انا تو و اللي تلقاها ترمي في الصحبة عالعباد و لو بلي بو كيف يتلمو كمشه و يشدو تركينة و يحلوها نقابة غاديكه
و اللي تقلك موش كنت قاعدة غادي شبيك بدلت ايا متغلطونيش عاد لا دبر في بابا وين نقعد زادا و اللي تغمك في الباقي و انت كان تطلع ناقص دورو الاما يطيشوك مالشباك
و على ذكر الشباك الله يرحمهم اكا الريدوات الخيشه خير منهم ولات تبارك الله الركاب قاموا بالواجب و كا الكليماتيزور و الا اللي هو اللي يبردو بيه الكار ما عاش يتحل و الموزايك ما عاش تخطف ضهرلي و الا الشوفور فد منها اهوكا ساعات يطلع معاك راكب يقوم بالواجب يحل الام بي كات متاعو و انت و زهرك اطيح بواحد ماركة نانسي عجرم و الا ماركة يا البابور يا مون امور
الحاصل شيء موسف وين الكنفور متاع بكري ايييه ما يدوم كان وجه ربي و ماذا بينا لوكان هالبنيات يعلموهم شويه اتيكات و احترام في التعامل مع الركاب رانا عباد و شارين مع النقل طرف سيرفيس في التيكي و ربي يكفيني و يكفيكم شر النقل الجماعي
بنت تونس
Bent Tounes
الجمعة اللي فاتت عرضتني زميلة لي ايام الدراسات الهندسية صدفة الحاصل عسلامة شحوالك سافا شحوال فلانة ما زلت تراها الخ الخ اي برا عدا و نحنا نحكيو قتلي انا توا نعمل في ماستير انحب انولي انقري مباعد و قتلي اللي هي جربت خدمت و الريتم ما ساعدهاش خاصة و هي قادمة على زواج او بما يعبر عنة في تونس بفرحة لعمر و بطبيعة الحال كيف باش تعرس يلزمها اكثر وقت لدارها خاصة و انها باش تاخو راجل اسبري اراب مع جميع احترامي بطبيعة
ضربت لحكاية في مخي و تفكرت كيف قالي احد اساتذتي نهار مالنهارات علاش ما تعملش ماستير تساعدك خير كطفلة اي ماو هذيكه اخرتها واحد يكلت عمرو كله و عايش على حلم باش في اللخر يلقى روحو يقري و شهرية مسمار في حيط و برا قول اكا لكليمتين و روح طيب لفطور و يزيك
نحب انقول للبنات كلمة وحدة اخترت ثنية في حياتك كمل فيها يا تكون ربة بيت على قاعدة صحيحة يا تختار خدمتك و كاريارك علاش انعبيو في الجامعات بناس اخر حاجة ينجموا يعملوها هي انهم يوصلوا معلومة لطالب و بعد قولو شبي مستوى الطلبة يتدهر كل عام
و راك كان تحب توفق بين دارك و مهنتك ممكن ياسر اذا كان تلقى شكون من عايلتك يشدلك صغارك في غيابك بيان سور ما قلتش كراش خاتر حسب ما قاعدة انرا الاهمال موجود و الصغير تطلع عندو مشكله في نموه و مشكلة في اخلاقه زادا سي نو تنجم تنقطع على الخدمة او تخدم في دارك لو ممكن لين يكبر صغيرك شوية و يحصل المنع ابار سا راك باش تظلم صغارك و تظلم روحك
بالطبيعه ما ننساوش دور الزوج يا حبذا يكون متعاون و يحب يرا مرتو ناجحة في حياتها المهنية موش ما كا النوع اللي مرتو تدخل بروجي جديد و هو في قلبه يتمنالها في الفشل
هذايا راي الشخصي و راي طبعا يحتمل الخطا ماني الا انسانه انحب انرا المراه حره و مستقلة و ناجحة اما انحب انرا زادا اجيال بيان ايدوكي و في صحة جيده و في حالة نفسية مستقرة
بنت تونس
